Davao City – Gipaalerto ang tanang kapulisan sa Davao Region subay sa nahitabong pagpamomba sa Koronadal City, South Cotabato niadtong adlawng Dominggo.
Gibutyag ni PRO XI Spokesperson PCI Milgrace Driz nga gipahugtan pa ang pagbantay sa mga awtoridad sa tibuok rehiyon aron dili makahigayon og sulod ang mga dautang elemento nga buot musabwag og kasamok.
“All units sa Davao Region shall increase the level of vigilance and intensify from more defensive mechanism especially on anti-terrorism ug pag-establish og mga checkpoints within their areas of responsibility, this would negate and deter the coming of some terrorists groups,” sumala ni Driz.
Matud ni Driz wala sila magkumpansya sa posibleng himuong diversionary attacks sa mga terorista.
Pahimangno niini sa publiko nga tabangan sila pinaagi sa paghatag og impormasyon kung aduna silay mga mamatikdang kadudahang lihok sa tao o butang sa ilang mga palibot.
Katimad-an nga tulo ka mga tao ang samaran sa pagbusikad sa improvised explosive device (IED) sa may Christ the King Cathedral.
Samtang daling na-detonate sa mga tinugyanan sa balaod ang lain pang bomba sulod sa basurahan sa usa ka convenience store duha ka kilometros gikan sa maong simbahan kinsa nakaplagan sa usa ka balut vendor.
RadyoMaN Aimee Guinita
