PRO XI Director Torre, gipatawag sa konseho tungod sa pag ilis-ilis og hepe sa DCPO

Davao City – Naghulat ang Davao City Council nga muatubang kanila si Police Regional Office (PRO) XI Director PBGen. Nicolas Torre III aron ipasabot kung unsa ang hinungdan sa iyang direktibang kanunay pag-ilis og hepe sa Davao City Police Office (DCPO).

Atol sa regular session niadtong July 16, 2024, giduso ni Councilor Luna Acosta ang iyahang resolusyon nga nag-demand sa Philippine National Police (PNP) ug kang Torre nga mutambong sa sunod nga session kauban ang bag-ong acting director sa DCPO nga si PCol. Hansel Marantan ug DILG.

Gibutyag ni Acosta sa iyahang privilege speech nga wala sa listahan ni Mayor Baste Duterte si Marantan nga mamahimong hepe sa Davao City.

Samtang sa bahin sa DCPO, gipanigurado ni Spokesperson Police Captain Hazel Tuazon nga andam si Marantan nga muatubang sa konseho ug gipaniguradong aduna may ‘change of leadership’, magpadayon ang ilang nasugdang programa ug serbisyo.

“Atong ipaniguro nga ang atong DCPO nga bisan og nag ilis-ilis ta og OIC and here comes sir Marantan, atong acting city director. Atong ipanigurado nga ang peace and order sa syudad atong top priority. Though naay changes pero atong PNP personnel, continuous atong programa,” segun ni Tuazon.

Sa pagsulat niining balita, wala pay pamahayag nga gipagula ang PRO XI sa tubag ni Torre sa panawagan sa konseho.

RadyoMaN Ivy Parido