Davao City – ‘Very satisfactory’ ang grado nga gihatag sa bag-ong hepe sa Police Regional Office 11 (PRO-XI) subay sa gipahigayong surprise inspection sa pipila ka mga presinto ilawom sa Davao City Police Office (DCPO) gisugdan alas-11:00 kagabii.
Sumala ni PRO-XI Regional Director Police Chief Supt. Marcelo Morales, 90% ka mga personahe ang on-duty sa night shift diin matud pa walay natulog ug nagsuot sa proper uniform ang kapulisan.
Segun ni Morales, una nilang gironda mao ang Sta. Ana PS dayon San Pedro PS misunod ang Talomo PS, Toril PS, Tugbok PS, Sasa PS lakip ang mga checkpoints sa Sirawan ug Lasang.
Gitataw sa PRO XI Regional Director nga ang 10% nga kulang mahitungod sa pipila ka mga pulis nga ni-absent ug wala direktang nananghid sa ilang nagkadaiyang supervisors gani nagpapuli kini sa oras sa iyang duty.
“Okay lang naman mag-absent pero dapat ipaalam lang sa immediate supervisors,” matud sa opisyal.
Samtang gibutyag ni Morales nga magpadayon sa gihapon ang mga surprise inspections sa mga presinto sa DCPO ingon man ang provincial stations ug sub-stations aron maseguro ug masuta ang ka-andam sa mga personahe sa kapulisan sa ilang nagkadaiyang areas of responsibility.
RadyoMaN Jason Amisola
