Davao City – Gidisarmahan ug anaa karon sa kustodiya sa Davao City Police Office ang duha ka mga sakop sa mobile patrol group kinsa nangdagmal og mga menor de edad sulod sa Barangay Hall sa Brgy. 19-B ning dakbayan.
Segun ni Police Regional Office-XI Spokesperson PCI Andrea dela Cerna nga ilang palawman pa ang imbestigasyon kalabot sa maong insidente.
“Right now we still have to make further investigation sa lahat ng side ng istorya. May mga nakita na tayong footages but we have to check kung sino ba talaga itong mga personalities involved, mga bata ba talaga kasi mahirap mag-speculate just watching the video,” sumala ni Dela Cerna.
Gibutyag ni Dela Cerna nga dili sila magpanuko nga silotan ug dili nila i-tolerate ang maong mga pulis kung mapamatud-an gayod nga nangulata kini og mga menor kinsa nakalapas sa curfew hours.
“Hindi natin ito-tolerate kung may pagkakamali man iyong ating mga kabaro dahil alam naman natin anong magiging stand nga ating mga leaders dito sa Davao Region na hindi natin palalagpasin pag may mali lalo pa’t men in uniform pa iyong involved,” segun ni Dela Cerna.
Samtang gikasubo sa Davao City Police Office ang maong alegasyon.
Matud ni DCPO spokesperson PSI Ma. Teresita Gaspan nga ilang giawhag ang mga complainant nga mupresentar og mga ebidensya.
Subay niini gimando ni Davao City Mayor Inday Sara Duterte Carpio ngadto kang DCPO Head PSSUPT Alexander Tagum nga imbestigahan ang mga nalambigit nga pulis.
Pahimangno sa alkalde sa kapulisan nga ipailawom sa kustodiya ang mga menor nga nakakumitar og krimen og dili dapatan gawas nalamang kung mabutang sa delikado ang ilang mga kinabuhi.
RadyoMaN Aimee Guinita
