Sumala kang Police Major Catherine Dela Rey PRO XI Spokesperson, wala pa sila’y namonitor nga mga Barangay sa rehiyon nga matawag nga hot spot area, sanglit dili pa init ang bangi sa politika sa Barangay ug Sangguniang Kabataan.
Gipasabot ni Dela Rey, ang magdeterminar sa mga hot spot area mao ang Commission on Election (COMELEC-XI) ug maghatag sa listahan sa mga lugar nga bantayan tungod sa away sa politika diha sa Barangay level. Hangtod karon, wala pa makapatawag og coordinating conference ang COMELEC, aron mahisgutan ang mga dapit nga angay ipailawom sa immediate concern sa election karong tuiga.
Hinoon, giangkon sa tigpamaba nga adunay 10 ka Barangay sa rehiyon onse kaniadto, ang anaa sa election watchlist, apan wa’y kalambigitan sa bangi sa politika ug ang pagpatay sa Sangguniang Kabataan Federation President sa Maco, Davao De Oro, dili usab matawag nga bangi sa politika, sanglit personal grudge ang migawas nga motibo sa krimen.
RadyoMaN Joel Viray
