Zamboanga del Norte – Sa tinguha nga maprotektahan ug mapanalipdan ang mga katungod sa mga gagmay nga mga kabataan sa tibuok probinsiya aron mamahimo kini nga malampuson sa tagsa-tagsa niini nga kinabuhi ugma damlag, motunol na usab sa ayuda pinansiyal ang kagamhanang probinsiyal sa Zamboanga del Norte ilawom sa pamunoan karon ni Governor Roberto Y. Uy ngadto na sa mga lungsod sa Roxas ug Liloy.
Kini maoy nasayran human gipasar sa mga sakop sa Sangguniang Panlalawigan sa Zamboanga del Norte sa pagpangulo ni Vice-Governor ug Presiding Officer Senen O. Angeles ang resolusyon may kalabot na sa maong programa atol sa gipahigayon nga regular session niini karong semanaha pa lamang.
Si Board Member Luzviminda E. Torrino ang mipasupot sa resolusyon nga naghatag sa otoridad ug gahum ni Governor Roberto Y. Uy nga mopirma sa Memorandum of Agreement (MOA) tali na sa Center for the Prevention and Treatment of Child Sexual Abuse (CPTCSA) pinaagi na ni Executive Director Zenaida S. Rosales sa Diliman, Quezon City, Mayor Jan Hendrick I. Vallecer sa lungsod sa Roxas ug ni Mayor Felixberto C. Bolando sa lungsod sa Liloy.
Ilawom sa nasangpit nga legal nga kasulatan, mohatag ang probinsiya sa pinansiyal nga ayuda sa kantidad nga Php 934, 838.80 samtang motampo ang Center for the Prevention and Treatment of Sexual Child Sexual Abuse (CPTCSA) sa kantidad nga Php 994, 838.80, ug mohatag usab ang LGU Roxas ug ingon man ang LGU Liloy sa kantidad nga Php 104, 700.00 matag usa ka LGU alang na sa kalampusan sa maong programa.
Nasayran usab nga ang probinsiya ug CPTCSA nagtambayayong alang na sa pagpatuman sa Comprehensive Child Protection Program for Zamboanga del Norte sukad pa sa tuig 2015 nga nagpunting sa paghatag sa importansiya ug katungod sa mga gagmay nga mga kabataan lakip na ang pagprotektar niini batok na sa physical ug sexual abuse. (ept/ksd)
