PALO, LEYTE – An probinsya han Leyte an may pinaka-hataas nga kaso hin panlugos ha bug-os nga Sinirangan Bisayas nga nahipatik tikang Enero-Desyembre 2017, ini in basi ha datos han Police Regional Office 8 (PRO8).
Mayda 197 nga kaso hin rape nga nai-record han Leyte Police Provincial Office dida han nakalabay nga tuig.
Ginsundan hini han Samar nga may 61 nga kaso, 51 ha Northern Samar, 37 ha Tacloban City, 33 ha Eastern Samar, 24 ha Southern Leyte, 31 ha Biliran ngan 15 ha Ormoc City.
Sumala han Police Regional Office 8, kaurugan ha mga nabibiktima han panlugos in mga kabataan nga nag eedad 11 ngadto 15 anyos nga nag-eeskwela ha Elementarya. Kaurugan ha mga suspetsado in mga kahagrani la nga mga tawo ngan waray permanente nga trabaho.
Pinakahataas gihapon ha Leyte an kaso nga attempted rape nga umabot ha 31, gin sundan han Samar nga may 10 nga kaso, 7 ha Eastern Samar ngan Northern Samar, 6 ha Tacloban City, 3 ha Ormoc, 5 ha Southern Leyte ngan Biliran,
Samtang, may tulo naman nga kaso hin incestuous rape o paryente la mismo an suspek an nai-record ha Ormoc, 2 ha Southern Leyte, ngan usa ha Eastern Samar ngan Samar.
Panawagan han Police Regional Office 8 ha mga mulopyo nga makipag-sumapayan dayon ha mga otoridad o tumawag ha numero nga 0947 890 7175 o 0938 919 4794 kun may mga insidente nga natatabo ha iyo lugar sugad han panlugos o rape.
