Gisugdan na sa probinsiyal nga kagamhanan sa Lanao del Sur ang pagpabuhat og testing laboratory sulod sa Amai Pakpak Medical Center sa Marawi City.
Matud pa ni Lanao del Sur Governor Mamintal Adiong, Jr., adunay usa ka building sulod sa compound sa APMC nga maoy gisugdan na sa pagtrabaho aron magamit na kini sunod bulan.
Nabisita na kini sa Department of Health aron ma-inspect ug inisyal nga aprubado ang nahimutangan niini.
Miingon si Adiong nga kapin kun kulang 20 milyones pesos ang bana-bana nga gastuhon sa maong pasilidad, nga naglakip sa makina o testing machine ug uban pang mga gamit sa sulod sa maong laboratoryo.
Magtinabangay sa gasto ang local government unit sa Marawi City, ang provincial government sa Lanao del Sur nga mihatag og 10 milyones pesos gikan sa Bayanihan Grant Fund ug ang APMC.
Mokabat sa 117 million pesos ang BGCM fund sa probinsiya nga equivalent sa 50% sa usa ka bulan nga internal revenue allotment o IRA sa probinsiya samtang ang LGU Marawi adunay nadawat nga singkwenta milyones pesos (50 million pesos). (Divina M. Suson, Lanao del Sur, May 19)
