Profiling sa rice retailers gihimo alang sa ayuda epekto sa ‘price ceiling’

Davao City – Ginalista na karon sa Department of Trade and Industry (DTI)-XI ang mga retailer nga apektado sa gipatuman nga temporaryong price ceiling sa bugas, subay sa Executive Order (EO) 39 nga gipatuman sa gobyerno.

Sa pakighinabi sa DXDC RMN Davao kang Deolly Roque, hepe sa Consumer Protection Division sa DTI-XI, ilang gibutyag nga kasamtangan nilang ginakuha ang buying price ug selling price sa mga rice retailer, diin kini ang mamahimong basehan sa assistance nga itunol sa Department of Social Welfare and Development (DSWD).

“Kadto ilang selling price kung ibaba to nila sa price ceiling, malugi gyud sila. So kadto gina-report to namo sa head office kay isa to sa input yata para i-determine kung kinsa tong nanginahanglan og assistance,” matud ni Roque.

Matud sa DSWD, muabot hangtud sa P15,000 nga ayuda ang madawat sa mga lehitimong small rice retailer, apan kini magbase sa listahan subay sa profiling sa DTI ug Department of Agriculture.

RadyoMaN Kirby Manzon