Ta manda hace acorda el otoridad con el publico aserca el cuantos prohiviccion na andada na mga lugar donde ta conduci con el mga actividades del Zamboanga Hermosa festival.
Asegun con el hefe del mando policia local Senior Supt. Neri Vincent Ignacio, cumbiene sigui el mga vivientes con el mga cuentos mandato de seguridad bajo con el Orden Ejecutivo BC-294-2017 que ya man issue de mas temprano el alcalde Beng Climaco-Salazar.
Bajo na mensyonao orden, cumbiene coopera el cada vivientes con el modo de seguridad ta implementa el policia y military na entero fueblo, particular, na mga lugar donde locao el actividades del Zamboanga Hermosa festival 2017.
Como syempre, no fuede usa mga hooded jackets, backpacks, bull caps, cargada del mga cosa agudas, armas de fuego, y el parquiada del mga vehiculo y mga motorsiclo donde-donde lang na fueblo.
Ta apela si Ignacio con el publico para suporta y coopera ya lang coneste mandato para hinde sila queda atrasado y cunsumido llegar el tiempo si abirigua canila el otoridad por el mensyonao mga violaccion stipulao na tal orden ejecutivo. – Bhong Simbajon/RMN News
