Roxas City, Capiz – Ginpasiguro ni Capiz PNP Provincial Director, Police Senior Supt. Samuel Nacion ang hugot nga pagpatuman sang “Project Tokhang Reboot” ukon liwat nga pagpatigayon sang toktok-hangyo sa mga poluy-an sang mga drug personalities sa probinsya sang Capiz.
Suno kay Nacion, katuyuan sang “Project Tokhang Reboot” nga hinyuon kag paandaman ang mga drug surrenderer nga nagbalik liwat sa pagbaligya kag paggamit sang iligal nga droga kalakip na ang mga newly identified drug personalities.
Pinaagi sini mapalab-ot sang mga kapulisan sa mga drug personalities nga mag-untat na sa pagbaligya kag paggamit sang iligal nga droga bangud wala gid ini sang ginahatag nga kaayuhan.
Ginpahayag dugang ni Nacion, nga dako ang posibilidad nga magakahibo man sa Capiz ang madinuguon nga operasyon kaangay sa mga nagakahinabo sa iban nga probinsya sa tion nga magbato sa mga kapulisan ang subject sang ila police operations.
