Davao city –Migawas sa regular session sa Davao City Council nga adunay kakuwang sa koordinasyon sa mga departamento sa lokal nga kagamhanan, DPWH ug sa MGB 11.
Gibutyag ni 3rd District Councilor Jesus Joseph Zozobrado nga walay sakto nga koordinasyon ang City Engineering Office, City Planning, DPWH, ug MGB 11 mao nahitabo ang landslide sa Shrine Hills.
Nasayran nga ang matag ahensiya nag-isig tinudluay kung kinsa kanila ang angay basulon sa pagdahili sa yuta sa Shrine Hills sa miagi nga semana.
Nasuta nga wala nakig-alayon ang DPWH sa MGB 11 sa gihimo nga road widening sa Diversion Road busa nagpataka na lang kuno og kabkab sa bahin sa bukid nga nagresulta na hinoon sa landslide.
Nasabtan matud pa ni Konsehal Zozobrado nga ang matag ahensiya adunay kaugalingon nga pamaagi sa koordinasyon ug kini ang buot usahon sa balay-balauranan sa dakbayan.
Alayon niini, gilaraw sa Davao City Council ang pagmugna og proper protocol sa mga buhatan sa siyudad ug sa mga nasudnong ahensiya sama sa DPWH aron gilayon maka-koordinar ang mao nga mga buhatan kung gikinahanglan man.
RadyoMan Joel Viray
