Davao City – Matag tuig, nagkalain-lain ang mga nagapanghitabo sa entero kalibutan.
Adunay positibo apan sagad muhatud og kahadlok sa tanan mao ang mga negatibong sitwasyon sama sa mga trahedya ug kalamidad nga wala gilauman apan giingong gipanagna nang daan.
Si Michel de Nostredame o mas nailang si Nostradamus, usa ka French apothecary kun expert sa pagpanambal nailhan na sa kalibutan gumikan sa daghanang namantala nga koleksyon sa iyang mga propesiya sa tibuok kalibutan.
Sumala pa ni Thomas Deckard, usa ka self-proclaimed prophet ug ni Dr. Camilo Mora, usa ka ecologist nga aduna nay mga nahitabo sa mga predisyon ni Nostradamus ug posibleng aduna kiniy abilidad nga matagna ang mahitabo sa umaabot:
Pipila sa mga gipanagna ug nakita nga panan-awon kun vision ni Nostradamus sa tuig 2020 mao kining mosunod:
Ang pagbaton og krisis sa ekonomiya sa kalibutan;
Pagbaton sa England ug bag-ong hari;
Pagpili pag usab isip presidente ni Donald Trump sa Estados Unidos luyo sa mga pagbatikos ug kontrobersiyang gi-atubang niini
Ang dili malikayang pagsila-ob sa gubat tali sa America ug China;
Samtang gipanagna usab sa maong visionary nga mahitabo usab ang outbreak sa World War III nga magsugod sa Middle East;
Pag igo sa mga makusog nga linog sa America, Europe ug Turkey;
Pagbaton og wildfires sa Amerika ug Europe;
Pag-implant ug mga chips sa lawas sa empleyado nga puli sa mga badges ug attendance sa trabaho diin nasugdan na kini sa usa ka kumpaniya sa Amerika;
Usa usab sa nakita sa famous astrologer mao nga pipila ka tawo magpuyo na sa bulan gani ma-validate kini sa anunsyo sa mga iladong modernong scientists nga plano karon sa National Aeronautics and Space Administration kun NASA nga magbaton kini og ekspedisyon paingon sa bulan karong tuiga kansang tumong mao ang human colonization sa moon ug sa Mars kun ‘Red Planet.’
Pipila lamang kadto sa mga gipanagna sa maong reputed seer alang sa 2020 kansang katumanan padayong gidebatehan karon sa mga End-Time analysts, theologians, futurists ug uban pang social forecasters kinsa nagkanayon nga dili scientific ang pamaagi ni Nostradamus kon dili, tagna-tagna lamang kini, gani ang uban niyang predictions wala man matuman.
Sa Bibliya, sa Proverbs 21:30, ang word of God nagpasidaan kanatong tanan:
“No wisdom, no understanding, and no counsel will prevail against the Lord.”
Kini nagpasabot lamang nga wala gayuy si bisan kinsang nasayud sa umaabot gawas Kaniya. Siya lamang ang in-control sa tanan, karon nga tuig ug sa umaabot pa nga mga kapanahunan.
Sa mga pagsulay ug kalamidad sa unahan, gikinahanglan lamang kita’ng magpabiling lig-on pinaagi sa hugot nga pagtoo ug pagbarog diha sa pulong sa Ginoo – ug dili diha sa mga panagna lamang sa tawo nga binuhat lamang sa Diyos.
RadyoMaN Kirby Manzon
