Davao City- Gipahinumduman karon ang mga adunay planong maglusad og protesta sa umaabot nga mga adlaw dinhi sa syudad sa Davao bahin sa mga gidili sa mga rally.
Subay kini sa gipagulang pamahayag si Davao City Mayor Inday Sara Duterte Carpio kabahin sa pag aresto sa napulo ka mga nagprotesta nga sakop sa Kilusang Manggagawa sa Coca Cola FEMSA Plantation sa Bago Aplaya ning syudad kaganinang buntag.
Matud pa nga sa mga adunay planong mag protesta, sigurohong dili babagan ang entrance ug exit sa estbalishemento, dili mang-harass og mga non-protesting employees ug pedestrians ug sigurohong dili sila makaapekto sa dagan sa trapiko sa syudad.
Sa opisyal nga pamahayag ni Mayor Inday pinaagi sa City Information Office, girespeto sa Davao City Government ang katungod sa katawhan nga magprotesta taliwala sa gipatumang balaud militar sa Mindanao.
Dugang niini, kanunayng gitahasan ang kapulisan ug kasundaluhan nga mag obserba og maximum tolerance sa pagbantay sa mga protesters aron malikayan ang giingong bayolenteng aksyon.
Giklaro usab nga dili makalikay ang mga nagprotesta nga misupak sa balaod diin matud pa nga ang napulo ka mga arestadong nagprotesta kaganina mag atubang og tukmang kaso sa korte.
Kahinumduman nga nagmalampuson ang kapulisan sa Talomo PNP sa pag disperse sa mga nag picket nga trabahante sa Coca Cola FEMSA Plantation kaganina.
Giserhan sa mga membro sa Kilusang Manggagawa sa Coca-Cola (KIMACO) ang duha ka gate sa planta alas 5:00 sa kaadlawon nga miresulta sa pagparalisar sa operasyon ug pagkatanggong sa ubang mga empleyado.
Wala makagawas ang mga delivery truck nga puno og softdrinks tungod kay nanghigda sa karsada ang mga membro sa union tungod sa gate sa maong planta.
RadyoMaN Renz Barbarona
