Walay estado sa kinabuhi, edad ug size ang nakababag sa empowered women nga murampa ug ipadungog ang ilang nagkandaiyang adbokasiya.
Gikan sa 29 hangtod miabot sa Top 15 finalists, mipailawom ang mga kandidata sa question-and-answer portion aron masala kung kinsa ba gyud ang angayang koronahan isip Mutya ng Dabaw 2024.
Gitawag nga ‘BIGGEST MUTYA’ apan nahimong ‘BIGGEST INSPIRATION’ ang pambato sa Barangay Cabantian nga si Hannah Maj Piccio nga maoy gikoronahang Mutya ng Dabaw 2024.
Una nang giangkon ni Hannah Maj kaniadto sa pakighinabi sa DXDC RMN Davao nga dakong pagsulay kaniya ang muapil sa maong pageant tungod matud pa sa iyang lawas nga daw wala napasok sa beauty pageant standards.
Apan inay mawad-an og paglaom, mas nadasig siya nga ipakita sa katawhan nga dili lawas ang basehan sa kaanyag kung dili ang maayong kasing-kasing nga mamahimong hulagway sa Davao City ug sa pagdala niini sa ‘wider and bigger arena’.
Malipayon si Hannah Maj nga ang dakbayan ug ang dabawenyos abri ang hunahuna ug kasing-kasing nga dawaton ang tanan bisan paman sa tagsa-tagsa ka kalahian.
“I’m happy that Davao City is taking that step towards inclusivity. I always envisioned Davao where women walk freely, free from body discrimination. I really hope it starts here. It starts today. I’m really really happy.”
Samtang gikoronahan usab nga Diwa ng Dabaw 2024 si Jan Marine Rendon gikan sa Brgy. Buhangin, Sinag ng Dabaw 2024 si Euanne Preglo sa Sasa, Pag-asa ng Dabaw 2024 si Fredelma Nova Corporal gikan sa Brgy. Governor Paciano Bangoy ug Patnubay ng Gabay 2024 si Abigail Balili gikan sa Brgy. Buhangin Proper.
RadyoMan Ivy Parido
