TACLOBAN CITY – Gindumara kakulop nga adlaw an Regional Inter-Agency Council Against Trafficking, Child Pornography, and Violence Against Women and their Children nga ginpangunahan han Department Of Social Welfare and Development (DSWD) kaupod an magkadurudilain nga ahensya sugad han DILG, PNP, CHR, NBI ngan Plan Philippines.
Ha ginpagawas nga datos han DSWD, may pito nga kaso han human trafficking ha Eastern Visayas dida han tuig 2015, 29 dida han 2016, 35 dida han 2017 ngan 22 na tikang Enero ngadto ha Marso 2018.
Haros kadam-an ha mga nabibiktima hin human trafficking ha rehiyon in mga kababayin-an ngan 2 pala nga kalalakin-an an nabiktima tikang 2017 ngan yana nga tuig.
Sumala kan DSWD Regional Director Restituto Macuto, nagpapabilin nga mayada la gihapon mga kaso hin human trafficking ha rehiyon mahitungod han kapobrehan, kawarayan masusudlan nga trabaho, inpluwensya han teknolohiya ngan mga nakapalibot nga tawo, ngan kawarayan hibaro ha mga balaod nga may kalabutan hini.
Ha breakdown han DSWD kada Probinsya, kadam-an nga mga nabibiktima in mga taga probinsya han Leyte, ginsundan han Samar, Northern Samar, Biliran ngan Southern Leyte nga may pangidaron 13-17 anyos, High School Level, ngan tikang ha mga pobre nga pamilya.
Nananawagan naman an may kalabutan nga mga ahensya ha pagbantay han human trafficking nga mas kinahanglan gud la gihapon an koordinasyon ngan komunikasyon ha mga otoridad kun pananglitan may nahihipatik nga mao nga mga sitwasyon.
