Provincial IATF, irekomendar sa Regional ug National IATF nga ipailawom ang Bukidnon sa GCQ gikan sa MGCQ

39

Nagpahigayon ug Virtual Emergency Meeting sa COVID-19 Provincial Inter-Agency Task Force (PIATF) kagahapong adlawa.

Sa interview sa RMN DXMB Malaybalay ngadto kang Ex-Officio Board Member Atty. Oliver Owen Garcia, gibutyag niini nga nag-unang gihisgutan nila ang nagkataas nga kaso sa COVID-19, ang kahimtang o status sa BPMC COVID Center, ug ang kabalaka alang sa kaluwasan sa katawhan sa lalawigan.


Sa mao nga panagtigum gipakisayud ni BPMC chief of hospital Dr. Miguel Antonio Prantilla nga nagkulang na ang bed capacity alang sa severe to critical cases, diin mamahimo lang mabakante kung adunay mamatay o maluwas. Sa paghisgut sa tigum, gidugang niii nga anaa sa 15 ang waiting list ug 2 na lamang ang bakante alang sa mild cases. Dinhi gitumbok nga gikinahanglan ang kooperasyon ug tabang sa mga pribadong ospital nga modawat sa COVID patients.

Matud ni Board Member Garcia nga giuyonan sa tanang miyembro sa PIATF nga mopadangat ug resolusyon ngadto sa Regional Inter-Agency Task Force, ingon man sa National Inter-Agency Task Force nga pahugtan ang Quarantine status sa Bukidnon gikan sa Modified General Community Quarantine to General Community Quarantine sa tinguha nga kapugngan ug mapaubos ang kaso sa COVID-19.

Gawas niini ilang usab nga gisugyot ngadto sa PGB nga mupagawas sa mga musunod nga kamanduan, pagpatuman sa province-wide liquor ban, unified curfew, ug pagbawal sa mass gathering.

Gipadangat ni provincial health officer Dr. Gary Guido C. Tabios, Jr. nga sa milabay’ng semana anaa pa sa 526 ang active cases sa Bukidnon apan sa pagkakaron, miihap na kini sa 739, kung aha aduna kini 155% growth rate diin makunsidera nga high risk ang probinsya. Kini ang rason nga gisugyot nga usbon ang quarantine classification sa Bukidnon.



Ang mao nga panagtigum gitambongan sa mga miyembro sa PIATF nga gilangkuban sa opisina sa DOH-Bukidnon, PNP, BFP, DILG, Board Member Oliver Owen L. Garcia, Provincial Administrator Jay S. Albarece, PDRRMD, PHO, Provincial Legal Office, Bukidnon Provincial chief of hospitals, PIA, ug sa PGO-PAIA.


Facebook Comments