Provincial IATF naalarma sa unang kaso sa Covid-19 UK Variant, emergency meeting gimugna

Pagadian City – Naalarma ang Zamboanga del Sur Provincial Inter-Agency Task Force gumikan sa pagsulod sa Covid 19 UK Variant sa probinsya hinungdan nga gimugna ang kalit ug dinalian nga panagtagbo.
Ang emergency meeting gitambungan nila ni DILG OIC Provincial Director Moh Tah Aracama, PNP Provincial Director Redentor Retusto, Dr. Anatalio Cagampang- sa IPHO ug Hepe sa ZDSMC, Dr. Corazon Ariosa isip representante ni Vice Gov. Roy Ariosa samtang nagsilbing presiding officer si Gov. Victor Yu.
Lakip usab nga nisalmot sa tigom ang Board Members sa probinsya ingon man ang mga mayor sa kalungsuran apil na si Pagadian City Mayor Samuel Co.
Gituki sa meeting ang teknolohiya sa S-Pass nga gipaila sa Department of Science & Technology (DOST).
Kabahin kini sa epektibo ug pinasayon nga pamaagi sa contract tracing gamit ang teknolohiya agi sa smart cellphone.
Adunay paga-agian nga proseso sa pagrehistro gamit ang smartphone o android cellphone ug paghatag matag morehistro ug unique nga QR code.
Gitahasan karon sa Task Force si Atty. Jihan Bana nga mogama ug pamaagi aron makat-unan sa tanang munisipyo sa lalawigan ang pamaagi sa paggamit sa S-Pass pinaagi sa usa ka training nga ipahigayon sa DOST.
Ang S-Pass adunay link sa ilang official Facebook page aron makarehistro ang mga residente.