Jamindan, Capiz- Naglab-ot sa kapin sa P4.4 million pesos nga balor sang budget pang-agrikultura ang ginhatag sang South Korean government sa munisipyo sang Jamindan.
Mahibaloan nga personal nga nagpadulong si Jamindan Municipal Mayor Mac Arthur “Mac” Valdemar para sa duha ka semana nga Agricultural Marketing and Finance Training and Seminar. Ang nasambitan nga training angginpatigayon sa Gyeonggi Province sa South Korea.
Ini ang kabahin lamang sang Panay Island Upland Sustainable Rural Development Project nga suportado sang Korea International Cooperation Agency kapartner ang Department of Agriculture.
Suno kay Valdemar, una na nga na-implementar ang phase 1 kag phase 2 sang amo nga proyekto kag may kaangot sini may yara sang igapatindog nga Bayanihan Tipon Center nga ginalauman nga sugoran subong nga bulan sang Hulyo. Sa amo nga BTC center, diri sarang nga ibaligya sang mga local farmers sang Jamindan ang ila mga produkto.
Nahibaloan nga tatlo ka mga barangay halin sa Jamindan, partikular ang Agcagay, Esperanza kag Pangabuan ang nalakip sa mga benepisaryo sang amo nga programa.
Maluwas sa Jamindan isa man ang banwa sang Tapaz sa resipyente sa amo nga programa sang South Korean government.
