Davao City- Makapadayon pa sa ilang nasugdan nga mga proyekto sa Barangay ang mga Brgy. Captains human nga gipagawas na sa Malacañang ang kopya sa pirmadong balaod subay sa pag-postpone sa election sa Barangay ug Sangguniang Kabataan (SK) nga gikatakda na unta karong October 23, 2017.
Sa interview sa DXDC RMN Davao kang Rodolfo Te, Brgy. Captain sa Brgy. Daliao, Toril ning syudad sa Dabaw, sumala niini daghan pa siya’g tiwasunon nga mga proyekto nga iyang nasugdan alang sa iyang mga constituents.
Apan dugang ni Te, wala gihapon siya’y problema og nadayon man ang eleksyon karong tuiga.
“Og sundon pud tong balaod nga every three years naay election, okay ra pud sa akoa para pud sa expression sa democracy sa mga constituents kung ganahan pa ba sila sa atoa o dili na,” sigun ni Te.
Kahinumduman nga giingon kagahapon ni Communications Sec. Martin Andanar nga pirmado na ni Pangulong Rodrigo Duterte ang Senate Bill 1584 kun hingpit na nahimong balaod nga Republic Act 10952.
Gikatakda ang eleksyon sa ikaduhang Lunes sa bulan sa Mayo sa 2018.
RadyoMan Renz Barbarona
