DAVAO CITY – Gimando karon ni President Rodrigo Duterte nga butangan og health desks kun center ang mga terminal sa bus ug mga sakyanan dinhi sa nasud.
Kini ang usa sa iyang pamahayag atol sa iyang pagsalmot sa 16th founding anniversary sa Supreme Tribal Council for Peace and Development, Inc. (STCPD) nga gipahigayon sa 3rd Infantry Battalion Headquarters sa Calinan, Davao City karong adlawa, Marso 23, 2018.
Sumala sa pamuno-nasud nga pinaagi niini, ma-check kadtong mga drivers nga dili angay mubyahe sama sa katulugon aron makalikay sa disgrasya ug tumong usb mao ang mapailawum sa drug test ang mga drivers.
Dugang sa pahayag sa pangulo nga kinahanglang pandakpon na ang mga operator ug driver sa mga colorum nga bus ug uban pang pampublikong sakyanan sa nasud.
Una ng giingon ni Special Assistant to the President Christopher Bong Go nga nagmando niini ang pamuno-nasud sa dihang mibisita kini sa mga biktima kaganina sa nahitabong disgrasya sa bus sa Occidental Mindoro nga gikamatay sa 19 ka tawo.
RadyoMaN Renz Barbarona
