Davao City – Gikatakdang makigsalo sa usa ka panihapon sulod sa palasyo sa Malacañang si Presidente Rodrigo Duterte ngadto sa 683 ka mga kanhi sakop sa komunistang NPA nga nisurender sa Eastern Mindanao Command.
Segun ni 1003rd Brigade Commander Col Ernesto Torres nga nakaskedyul karong Pebrero 6-10 ang pakigkita sa presidente sa mga surrenderees diin bahinon sila ngadto sa tulo ka batch.
Gisulti ni Torres nga ang maong aktibidad nagpakita kung unsa ka seryuso ang pangulo sa pagtubag sa ugat hinungdan sa problema sa insurhensiya dinhi sa nasud.
Sumala ni Torres makigistorya usab ang president ngadto kanila kalabot sa mga update sa ilang mga nadawat nga mga tabang ubos sa programa sa gobyerno.
Matud kang Torres nga ang pakigtagbo sa mga kanhi rebelde parte sa ilang Educational Tour didto sa Manila, diin gawas sa Malacanang mubisita pa usab sila sa mga nagkadaiyang lokasyon sama sa mga historical sites ug sa TESDA nga makahatag pa ug dugang kaalaam para kanila.
Laing dinner usab ang nakaschedule para sa mga rebelde uban si AFP chief of staff Commander Lt. Gen. Rey Leonardo Guerrero.
RadyoMaN Aimee Guinita
