Davao City- Gikalipay sa Victims of Injustices Criminality and Terrorism in Mindanao ang pagkamatay nila Isnilon Hapilon ug Omar Maute human sa upat ka oras nga binakbakay sa Marawi City gahapon sa buntag.
Gidayeg ni VICTIMS Convenor Arthur Tariman ang kaingat sa mga sundalo sa operasyon busa buhi naluwas ang 17 ka hostages samtang patay sila Hapilon ug Omar Maute human sa lima ka bulan nga Marawi Siege.
Si Hapilon nga lider sa Abu Sayyaf Group maoy giila nga Emir sa Islamic State (ISIS) sa Southeast Asia ug dunay reward nga 10 million dollars, samtang si Omar Maute may patong nga 5 million dollars.
Nawad-an man og lig-on nga mga lideres ang mga terorista apan angay kuno dili magkampante ang militar nga mahuman na nila ang giyera sa Marawi city.
Dili kawad-on sa mga terorista ang kamatayon ni Hapilon ug sa Maute Brothers sanglit dali ra kuno sila makapuli og laing lider labi pa nga daghan ang gaapas nga tawgong Emir sa Southeast Asia.
Ang massive nga recruitment sa Maguindanao ug North Cotabato timaan nga mas baga pa og sakop ang teroristang grupo busa lisod pa matuldukan ang terorismo sa Mindanao.
Gikumpirma ni Tariman nga sa karon aduna na kuno’y usa ka libo ka tawo nga sakop sa Islamic State nga nagpalibot karon sa Maguindanao ug North Cotabato.
Ang nasangpit nga mga indibidwal gikan matud pa sa sa BIFF, MILF ug uban pang armadong grupo nga mihangop na sa ISIS kinsa galabang-labang lang kuno sa duha ka probinsiya karon.
Busa lantaw sa VICTIMS, sigurado malisdan si Presidente Rodrigo Duterte sa pagpildi sa terorismo labaw na nga komplikado ang ugat hinungdan sa ilang pakigbisog sa Mindanao.
RadyoMan Joel Viray
