PSA XI: Andam sa digital transition kung maduso ang pagpaundang sa national physical I.D

Davao City – Gisiguro sa Philippine Statistics Authority (PSA) Davao nga kung maduso man ang sugyot ni Senador Bato Dela Rosa sa pagpa undang sa pagprinta og mga National I.D Cards, andam sila nga musunod niini ug mas palapdan pa nila ang ilang serbisyo sa digital nga paagi.

Sa interview sa DXDC RMN Davao kang PSA Davao Region Registration Officer Baby Jean Alid atol sa Straight to the Point Morning Edition kauban si RadyoMan Misel Miral-Galve, iyang gibutyag nga sa iyang kaugalingong panlantaw dili kini mamahimong undangon tungod matud pa naanad na ang katawhan nga aduna’y card nga ginadala o ginapakita sa bisan unsa mang transaksyon ug dili tanan aduna’y cellphone.

Apan, kung ugaling maaprubahan man, gilayong dili kini angay kabalak-an tungod gipangandaman na sab sa ilang buhatan ang transisyon sa physical ngadto sa digital I.D.

Subay niini, sa kinatibuk-ang rehiyon onse aduna na’y narehistro ang PSA alang sa National I.D nga 4.1M ka indibidwal ug ang mga nahatag na nga anaa sa 2.7M base sa talaan sa September 15, 2023.

RadyoMan Ivy Parido