Davao City – Mga residente sa usaka gambalay dinhi sa dakbayan gipa-evacuate na sa mga awtoridad gumikan sa kadelikado niini panahon nga adunay katalagman nga mahitabo partikular ang earthquake.
Matud ni Public Safety and Security Command Center (PSSCC) head Angel Sumagaysay, ang orden base sa rekomendasyon sa City Disaster Risk Reduction Office (CDRRMO).
Gi-cordon na karon ang Family’s Drug Store nahimutang sa may Barangay 22, Boulevard, ning syudad sanglit peligroso na kini nga istruktura.
“Mao ni ang pinakauna nga na-record namo together with CDRRM personnel,” sumala ni Sumagaysay.
Dugang ni Sumagaysay nga nagpadayon gihapon ang ilang post-quake assessment and evaluation sa tanang mga government establishments ingon man tulunghaan sa posibleng damyos.
Base sa latest initial assessment, napulo na ka mga establisimyento nakahiagom og minor cracks kalakip ang kadaut sa Palmetto Condo sa Maa, Queensland Hotel sa Matina Aplaya ug Market Place, Gaisano Grand sa Barangay Tibungco.
Pito usab ka istruktura nakabaton og major cracks usa na dinhi ang Center Point Overpass sa Barangay Matina Crossing.
Usab laing duha ka mga tulay nakasinati og damyos gumikan sa maong pagtay-og.
Sa pikas bahin, mitunol og hinabang ang City Government ngadto sa nalinogan pinaagi sa technical assistance ug uban pang klase sa suporta.
Gani, matud ni Davao City Administrator Zulaika Lopez, nagmando na si Mayor Sara Duterte-Carpio nga magpadala og mga personahe alang sa medical services ingon man alang sa search and rescue operations sa mga dapit nga gilampornas sa linog kagahapon.
Gi-awhag ni Lopez sa katawhan nga magpabiling vigilant sa tanang panahon ug maminaw sa abiso sa mga disaster action teams ingon man dili mag panic aron kalikayan ang pagka-angol.
“(We) cannot control natural calamities but what we can control is our behavior…we have to stay alert and we have to stay focused and we always have to listen to disaster action team leaders and never to panic. Presence of mind because it is our survival,” saysay sa maong opisyal.
Kahinumdoman nga aduna nay 442 ka mga aftershocks natala denhe sa Davao region diin posible pa kining madugangan.
RadyoMaN Jason Amisola
