Davao City – Ang tanang mga kabataan kinsa naapektohan sa kalamidad ginapailawom sa prosesong gitawag nga ‘psycho-social intervention’ aron mahibalik ang ilang maayong perspektibo luyo sa mga nasinatiang kalisdanan tungod sa trahedya sama sa sunod-sunod nga makusog nga linog nga nasinatian sa Davao del Sur, North Cotabato ug uban pang dapit sa Mindanao.
Sumala ni Jenielito Atillo, Department of Education (DepEd-XI) Information Officer, ang intervention ginahimo sa pagpanguna sa Department of Social Welfare and Development (DSWD) inabagan sa mga magtutudlo diha sa mga eskwelahan.
Matud ni Atillo, namugna kini nga matang sa proseso kun intervention human sa nasinatiang bagyong Pablo kaniadto.
Gi-angkon usab ni Atillo nga kapin 400 ka mga classrooms sa tibuok rehiyon ang nadamyos ug dili pa magamit karon human sa linog nga nakaapektar sa klase sa mga estudyante.
Dugang ni Atillo ng ang unang hinanaling aksyon nga ilang sagad ginahimo mao ang pagpangita ug mga available classrooms diha sa mga tulonghaan nga luwas gamiton human gideklara sa mga licensed structural engineers nga walay angay kabalak-an sa aspetong sturcutral integrity.
Sa higayon nga matumbok na kini, didto sila paadtoon aron didto magklase dungan usab sa pagtukod sa mga tent ug pagbahin-bahin sa mga estudyante sama pananglit sa upat ka Grade 5 sections diin naapektohan ang duha, i-distribute sila sa duha ka sections.
Samtang gipasabot usab ni Atillo nga ang taas nga period mao ang pagtukod ug mga bag-ong schoolbuildings sa mga lugar nga luwas sa katalagman.
RadyoMaN Bernard Pantallon
