Davao City – Gumikan sa presyur sa trabaho ug personal nga problema, daku ang kahigayonan nga makasinati og depresyon ang usa ka trabahante nga puwedeng maghatud sa suicide kung walay ekspertong mutabang sa pag-sulbad sa iyang mga suliran.
Gibutyag karon ni Agni Joy Pernes, kanhi Counseling Professor sa Koinonia Theological Seminary Foundation nga ang mga tawo kinsa nakasugata og mga problemaug nagkinahanglan og hinanali nga atensiyon sa psychologist ug counselor aron mapunggan ang estado sa depresyon ug masalba sa suicide.
Busa, pabor si Pernes kinsa 13 na ka tuig sa propesyon sa counseling sa sugyot nga dapat magbaton og psychologist ug counselor ang mga kumpanya nga maoy magtutok sa mga trabahante nga makasinati og presyur sa trabaho ug suliran sa kinabuhi.
Gipasabot ni Pernes nga daghan sa mga trabahante magkasakit og depresyon tungod sa presyor sa tra-baho ug samotan pa sa suliran sa pamilya ug kung dili kini mabantayan hayan musangko sa suicide ug ang ingon ani nga kahimtang angay seryosohon sa mga kumpanya ug sa uban samtang dili pa ulahi.
Alayon ani, gipabantay ni Pernes ang matag indibidwal sa mga mensahe ug mga hulagway nga ma-post sa social media sama sa Facebook kay aduna kini dad-on nga negatibong epekto hilabi na kung magsu-god na og pagbugwag sa gibating kahiubos sa kinabuhi kay factor kini sa depresyon ug suicide.
Migula sa pagtoon nga ang sobrang pagbabad sa social media maoy culprit sa taas nga kaso sa depresyon ug suicide incidence sa panahon karon diin pati 9 anyos nga bata nga makasab-an sa ginikanan magpakamatay dayon.
Tambag ni Pernes alang sa tanan nga dili ugumon ang mga problema nga muabot sa kinabuhi inay isulti kini sa uban kun mangita og kaistoryahan sama sa psychologist ug counselor kun pastor aron magiyahan sa angay buhaton sa matag problema nga muabot sa kinabuhi.
RadyoMaN Joel Viray
