Sa padayong pagtunol sa DXDC og kinasing-kasing nga serbisyo publiko, andam ang sibyahanan nga mohatag og assistance nga kinahanglan sa maong ospital aron mas daghang mga nangihanaglan og operasyon ang makahibalo bisan asa man sa Pilipinas.
Ang Tebow CURE Hospital ang pinaka-una ug nag-inusarang ospital sa nasud nga nagatunol og Kristohanong pag-alima ug libreng operasyon sa mga batang dunay treatable disabilities.
Gawas sa ilang world-class nga medical care, nagtinguha usab ang maong ospital nga atimanon ang emosyonal ug espiritwal nga panginahanglan sa matag pasyente lakip na ang ilang pamilya ug ang komunidad.
Ubay-ubay na nga mga tigpaminaw sa DXDC ang midangop sa sibyahanan aron ma-operahan ug dali kining gi-coordinate sa Tebow CURE Hospital nga miresulta sa ilang kaayohan. Libreng surgeries alang sa mga kaso sama sa cleft lip ug cleft palate, speech therapy, ug deformities ang ginadawat sa maong ospital alang sa 18-anyos paubos.
Nagtinguha ang DXDC ug Tebow CURE nga magtinabangay pinaagi sa pagsibya ug pagpahibalo niadtong mga nanginahanglan og operasyon. Sa ingon, mousab kini sa kinabuhi sa daghang kabataan kinsa nakasinati ug pag-bully ingon man nawad-an na og paglaom sa ilang kahimtang.
Atangi ang mas palapdan nga partnership niining sibyahanan ug sa maong ospital.
RadyoMaN Misel Miral-Galve
