Roxas City – Kapin sa duha ka libo ang kabug-usan nga numero sang mga nakabenepisyo sa ginpatigayon nga RMN Public Services Expo 2017 kadungan sang ika 65 anyos nga anibersaryo sang RMN.
Nagsugod ang mga aktibidad sang DYVR RMN Roxas sadtong Agosto 18 kon sa diin ginpatigayon ang feeding program sa pila ka daycare centers sa syudad sang Roxas.
Ginpatigayon man sang Agosto 25 ang free dental services sa Brgy. Culasi, Roxas City kaupod ang Capiz provincial government. Ginsundan ini sang free check-up kag medical mission sa Brgy. Milibili ka-partner ang Joel P. Longares Foundation sang Agosto 26.
Nangin madinalag-on man ang Free legal consultation sa RMN Broadcast Center sang Agosto 27. Kaina sang aga, Agosto 28, kadungan sang kaadlawan sang RMN ginhiwat ang free eye check-up kag pagpanagtag sang libre nga eye glasses sa Robinsons mall.
Magluwas sa nasambit nga mga aktibidad, may ginpatigayon man nga libre nga masahe kag gunting ang DYVR RMN Roxas. Ini nga mga programa ang kabahin lamang sang ika 65 anyos nga anibersaryo sang RMN sa padayon nga pagdul-ong sang matuod nga serbisyo publiko.
