Davao City – Hugot nga nagpasidaan karon ang Davao City Anti-scam unit sa publiko nga mag-igmat batok sa pipila ka mga organisasyon nga gapangdani aron mag-invest bugti sama sa 30 porsyentos nga tubo sa ilahang mga kwarta.
Sa interbyu sa RMN Davao kang Anti-Scam Unit head Simplicio Sagarino gibutyag niini nga gikonsiderang scam sa sa Securities and Exchange Commission kun SEC ang Kapa Community Ministry International, Inc. ug ALMAMICO (Alabel Maasim Small Scale Mining Cooperative).
“Ang 30% mao ni ilang ginasaad sa mga investors nga kung naa every month mao niy mubalik sa imoha. Magbinantayon ta ug dili ta magpailad kay mao ni sila ang gapangilad sa atong katawhan” segun ni Sagarino.
Kasamtangang ga-operate ang maong grupo sa Glan ug Alabel, Sarangani province; Bislig City, Surigao del Sur, General Santos City ug South Cotabato.
Gipasabot ni Sagarino nga base sa advisory gikan sa SEC nga ang Kapa kinsa gipanguluhan ni Pastor Jun Apolinario nga walay secondary license maong dili kini awtorisadong mag-solicit ug mga investments sa katawhan.
Gibatbat ni Sagarino nga mamahimong ipadangat ang ilahang mga reklamo sa ilahang opisina diha sa 3rd Floor, Lingap Bldg., A. Pichon St., Davao City o sa opisina sa SEC Davao Extension Office sa may SDC Building, Purok 13, Ma-a Road, Ma-a, Davao City o itawag kini sa numerong 298-2170.
Matud niini nga sa pagkakaron wala pay mga reklamo nga ilahangf nadawat sa ilahang buhatan kalabot sa mga nasangpit nga grupo.
Samtang segun sa SEC nga mamahimong masilotan ang bisan kinsang mga muapil niini nga mga schemes.
RadyoMaN Aimee Guinita
