Pinag-iingat ni Senator Sherwin Gatchalian ang publiko sa paggamit ng mga Christmas light at iba pang pamaskong dekorasyon na ginagamitan ng kuryente upang maiwasan ang sunog.
Ayon kay Gatchalian, ngayong holiday season ay dapat na iprayoridad din natin ang kaligtasan ng ating mga tahanan at komunidad.
Babala ng senador, ang mga faulty wiring, overloaded outlets at mga hindi ino-off na dekorasyon ay maaaring mauwi sa trahedya sa halip na kasiyahan.
Mainam aniyang salubungin natin ang Pasko at Bagong Taon na masaya at ligtas mula sa kapahamakan ang lahat.
Hinimok ng mambabatas ang bawat pamilya na regular na suriin ang kanilang dekorasyon upang maiwasan ang overloading ng mga electrical circuit at magkaroon ng basic fire safety measures na nakahanda sa bawat tahanan.
