Deretso gilubong, pasado alas-4:00 kagahapon sa hapon, ang usa ka patient under investigation nga namatay kagahapon sa buntag didto sa Amai Pakpak Medical Center sa Marawi City.
Didto kini gilubong sa Maqbarra Provincial Public Cemetery sa Barangay Papandayan Caniogan kung asa gilubong ang kapin 200 ka mga namatay panahon sa Marawi siege niadtong 2017.
Ang pasyente, usa ka lalaki nga nagpangidaron og 50 anyos, namatay pipila ka oras ayha miabot ang resulta sa yang COVID test matud pa ni Zia Alonto Adiong, tigpamaba sa Lanao del Sur Task Force Stop COVID-19.
Positibo, matud pa, nga nataptan kini sa COVID-19.
Wala pay gihatag nga code ang Department of Health sa maong pasyente ug wala pa usay laing detalye nga gipagawas ang TF COVID sa Lanao del Sur tungod kay wala pa kini gitugutan sa DOH.
Matud pa ni Adiong, gipangunahan sa mga personahe sa Provincial Disaster Risk Reduction and Management Office (PDRRMO) sa Lanao del Sur ang paglubong sa pasyente suot ang hazmat suit.
Human sa lubong, mi-agi sila sa husto’ng disinfection process lakip ang sakyanan nga gikargahan sa patay’ng lawas ayha sila mibalik sa kapitolyo.
Ang hazmat suit nga ilang gisu-ot gilayong gisunog isip pagsunod sa guideline sa DOH.
Gilubong ang namatay base sa tradisyon sa Islam lakip na ang dili pag-cremate niini, apan nagsunod sa istrikto’ng protocol sa DOH nga walay burial ceremony ug walay mga kabanay nga motambong.
Sa Lanao del Sur, adunay 75 ka mga persons under monitoring as of March 16.
Adunay lima pa ka mga PUIs sa APMC ug tulo nga nagtago, base sa Joint Executive Order Number 001, series of 2020 nga gipirmahan nila ni Gov. Mamintal Adiong, Jr. Ug Marawi Mayor Majul Gandamra.
Ang Lanao del Sur ug Marawi City gipailawom na sa community quarantine sugod kagahapon, Marso 17. (Divina M. Suson, Marawi City, March 18)
