Davao City – Luyo sa sunod-sunod nga pagsaka sa presyo sa produktong petrolyo nunot sa epekto sa TRAIN Law walay plano ang usa ka transport sector sa dakbayan sa Dabaw nga magpa-usbaw sa pletehan.
Bisan og makapila na ka higayon nag-usbaw ang presyo sa ilang produktong petrolyo apan walay plano si Southeastern Mindanao Diversified Drivers Operators Cooperative President Maning Duran nga mag-duso og umento sa pletehan sa mga PUJ.
Segun ni Duran nga wala pa nila mabati ang epekto sa P7.00 nga excise tax sa produktong petrolyo busa wala say rason aron magduso og petisyon sa buhatan sa LTFRB alang sa usbaw sa pletehan.
Apan kun dili na makaya sa ilang mga drivers ug mga operators ang walay hunong nga pagsaka sa presyo sa petrolyo diha pa sila magyamar sa LTFRB 11 aron pangayoon ang usbaw sa pletehan.
Duha ka matang sa rason ang posibleng ilang gamiton nga rason sa pagpasaka sa pletehan una kung mag mahal na ang spare parts sa mga sakyanan ug magmahal ang mga nag-unang palaliton.
Dugang ni Duran nga ila una paabuton nga muabot na og P10.00 ang usbaw ayha sila mangayo og dugang P4.00 nga umento sa pletehan gikan sa P8.00 mahimo na unya og P12.00.
Giangkon sa pangulo sa SEMDDOC nga aduna na silay mga sakop nga nagmulo ug nag-awhag kanila sa pag-file og petisyon sa LTFRB apan gibarugan ni Duran nga dili pa panahon alang sa dugang pletehan.
RadyoMaN Joel Viray
