PUJ ‘phaseout’ gibangian

11

Davao City – Nilipang karon ang oposisyon sa kontrobersyal nga Public Utility Vehicle (PUV) Modernization Program sa gobyerno kansang tumong mao ang pag-improbar sa estado sa pampublikong panakayan sa nasud.

Taliwala niini, gitino sa Department of Transportation(DOTr) nga walay basihan ang gikabalak-ang displacement kun dislocation sa panginabuhi sa mga Public Utility Jeepneys (PUJ) drivers sa nag-unang mga kasyudaran sama sa Davao City.

Sa interview sa programang RMN Straight to the Point, gitino ni DOTr Assistant Secretary Elvira Medina nga dili angay mabalaka ang mga PUJ drivers ug operators sanglit adunay tugbang nga pondo nga itunol ang kagamhanan haron kadtong buot mo-modernize sa ilang mga yunit makadawat sa igong asistinsiya gikan sa gobyerno.

Si Medina, kinsa presidente usab sa grupong National Center for Commuter Safety and Protection nagkanayon nga ang programa gitumong sa modernisasyon ug dili phaseout sa mga apektadong public utility vehicles nga nag-edad na ug kinse anyos pataas.

Apan lahi ra ang gibarugan sa mga driver, pasahero ug bisan pa man sa mga PUJ operators: Sila nagtoo nga maayo tuod ang tumong apan ang pamaagi malagmit mosangpot sa pagkakulob sa ilang kaldero.

Segun sa usaka Lino Bunani, 49 anyos nga PUJ driver nga taga Mintal supak siya gumikan sa pagkawala sa ilang panginabuhi. Usa ka Boyet Bustamante, 53 anyos nga operator nga taga Ecoland uyon sa ‘modernization’ basta seguraduhon lamang sa pamunuan nga maplastar ug ensakto ang maapektuhang sektor samtang usaka pasahero nga si Jean Balandre, 21 anyos nga taga Ecoland dakung pabor sa sugyot haron mohilway na ang atong sistema sa panakayan.

Kasamang June Duterte

tags: Mindanao, Davao City, DXDC, DXDC 621, Straight to the Point, June Duterte, Elvira Medina, Department of Transportation

Facebook Comments