Pilason si PO2 Dorben “Benjo” Acap, assigned sa RPHAU sa Campo Delgado matapos gin-ambush sang duha ka pares sang riding in tandem sa Sitio Paho, Dulunan, Arevalo pasado alas 4 sini lamang nga hapon.
Suno sa mga nakasaksi, sakay sa pula nga Honda Civic si Po2 Acap padulong sa Distrito sang Arevalo sang gin-ingudan ini sang duha sa MIO motorcycle nga may tag-duha ka sakay nga mga suspek.//
Ginpahayag nga ginluthang sang mga suspek ang salakyan ni PO2 Acap kon sa diin naigo ini sa iya nawala nga abaga.
Nakatigayon naman nga makabalos si PO2 Acap kag naigo sini ang angkas sang nauna nga motorsiklo kabangdanan nahulog ini sa karsada kag ginpahayag nga naigo man ang driver apang wala mapuruhan.
Natigayon nga makarga sang iya upod ang nahulog nga backrider kag nagpalagyo padulong man sa area sang Arevalo.
Gindala naman sa ospital si PO2 Acap para sa nagakaigo nga pagbulong.
Padayon pa nga gina-imbestigahan sang Arevalo PNP ang nasambit nga insidente agud matumod ang mga suspek nga nagtuyo magpatay sa nasambit nga pulis kag kon ano ang motibo sa likod sini.
