Gintiro patay sang wala pa makilal-an nga suspetsado ang isa ka pulis sa Reclamation Area, Barangay 1, banwa sang Pontevedra, Negros Occidental las 6 subong nga aga.
Suno kay Police Captain Hancel Lumandaz, hepe sang Pontevedra PNP, ginkilala ang biktima kay Police Staff Sergeant Ildefonso Casugod, 37 anyos, katapo sang intelligence operative sang amo nga police station kag residente sang Barangay Recreo sang nasambit man nga banwa.
Nagabisikleta sa lugar si Casugod sang nanaug ini kag nag-istorya kay Pontevedra Mayor Jose Maria Alonso nga yara man sa amo nga lugar.
Hinali na lang nga may nagpalapit nga persona kag ginluthang si Casugod.
Igo sa ulo ang naangkon sang biktima nga amo ang gintunaan sang iya kamatayon.
Gilayon nga nagpalagyo ang suspetsado matapus ang krimen.
Sa karun padayon ang imbestigasyon sang mga otoridad sa nasambit nga insidente.
Gina-usisa man sang pulis kon may CCTV nga nakakuha sang footage sang pagpangluthang.
(Radyoman Grace Supe photo/DYHB)
