Pulis gintiro sang makatatlo ka beses sa guwa sa iya balay, naospital

17

SAN CARLOS CITY, NEGROS OCCIDENTAL – Gina establish pa karon sang San Carlos City Police Station ang motibo sa natabo nga pagtiro sa isa ka pulis kagab-i sa Brgy. Rizal, ciudad sang San Carlos.

Nakilala ang biktima SPO2 Carlos Alob, 45 anyos ang edad, kasado, residente sang Lot 20 Block 5, Fatima Village Phase 1, Brgy. Rizal, San Carlos City kag assigned naman sa La Castellana Municipal Police Station.

Ginpahayag ni San Carlos City Police chief, S/Supt. D’Artagnan Katalbas ang insidente natabo mga las 7:40 kagab-i sa gwa man lang mismo sang balay sang biktima sa Brgy. Rizal.

Suno sa imbestigasyon, ang biktima naga-tindog sa gwa sang ila balay nga wala sang bayo kag nagpanigarilyo sang ini ang gindulugan sang mga suspek nga naga-angkasanay sa motor kag hinali na lamang nga gintiro sang makapila ka beses.

Nag-angkon sang mga pilas sa tuo nga tyan, tuo nga palad kag wala nga tiil ang biktima apang wala ini napuruhan kag padayon karon ginabulong sa isa ka ospital diri sa ciudad sang Bacolod.

Samtang, ang mga suspek naman gilayon nga nagpalagyo sa wala mahibaluan nga direksyon sakay sa Yamaha Mio Aerox155./dyHB BACOLOD

Facebook Comments