Pagadian City Anaa na karon sa luwas nga kahimtang ang usa ka pulis officer nga gipusil niadtong nakalabay nga gabii dihang dapita sa Purok Madasigon, Jamisola Street, Brgy. Sta. Lucia ning syudad.
Gapa-alim pa sa iyang samad pinusilan sa balay tambalanan ang biktimga nailang si PO2 Prometheus Paras Remolador, 41 anyos, ilalom sa kamanduan sa Regional Mobile Force Company.
Samaran usab ang duha ka sibilyan nga nailang si Glendel Garciano Delator,33 anyos, ug Melchor Pasyol Siso, pulos manletchonay nga sakop ra usab sa maong pulis.
Sa inisyal nga imbestigasyon nasayran, nga alas 8:45 sa gabii, samtang anaa sa lugar ang mga biktima kalit nga nibutho ang duha ka mga suspek nga sakay sa motorsiklo og walay langan nga nipusil sa nahisgutan nga pulis.
Wala na makabalos ang biktima dihang naigo sa iyang too nga dughan ug napagan usab ang duha ka sibilyan.
Nakuha sa dapit nahitaboan ang mga basiyo sa bala sa 45 nga pistola nga maoy gigamit sa wala mailang mga suspek.
Blangko pa ang mga imbestigador sa motibo sa maong pagpamusil.
