Mi-abot sa 15 ka mga indibiduwal ang posibleng natakdan sa COVID-19 patient nga si IC245, o ang police sa station 4, kinsa unang nag-positibo sa virus niadtong nakalabay’ng semana.
Sa report sa Emergency Operations Center Health Cluster sa lokal nga inter-agency task force, unom ka mga babaye ug siyam ka mga lalaki ang nag-positibo sa coronavirus human sila ma-expose sa 45 anyos nga pulis, residente sa Barangay Pugaan ning siyudad.
Unom kanila mga residente sa Barangay Tubod, duha ang taga-Barangay Ditucalan, usa taga Barangay-Upper Hinaplanon, usa taga Barangay-Suarez ug upat taga-Pugaan.
Onse kanila ang mga anaa sa isolation facility gi-quarantine, ang upat, kinsa gitouhang kauban sa pasyente sa iyang pamilya, ang naka-home quarantine lamang.
Adunay nuwebe ug kinse anyos sa maong mga nataptan sa virus, samtang ang pinaka-edaran kanila, 72 anyos nga taga-Barangay Ditucalan.
Gideklarang local transmission si IC245 tungod kay dili na ma-trace ang hinungdan sa iyang infection.
Kung kahinumduman nga Miyerkoles, Agosto 26 unang gidala sa isolation facility sa NSC ang 40 ka mga pulis sa station 4, usa nila ka cook ug 14 ka mga detainees human makumpirma ang kahimtang ni IC245.
Agosto 27, Huwebes, dihang dungan silang gikuhaan sa swab sample alang sa RT-PCR testing.
Wala pa migawas ang resulta sa ubang mga gipang-swab test.
