Davao City – Daling gidakop sa Talomo PNP ug DCPO SWAT ang usa ka pulis nga nagpabuto sa pito ka higayon sa iyahang armas bandang ala-1:00 sa hapon adlaw’ng Dominggo sa may Shrine Hills, Matina ning syudad.
Giila ni Davao City Police Office Head P/Sr. Supt. Alexander Tagum atol sa interbyu sa RMN Davao ang suspek nga si PO1 Glonard Bryan Maneja sakop sa Mobile Patrol Group.
Hubog matud pa ang nagpabutong pulis samtang nakiglalis kini sa usa ka babae.
Segun ni Tagum nga patong-patong nga kaso ang ihan-ok sa suspetsado ug gikatakdang taktakon kini sa serbisyo.
“Pasakaan namo ni siya’g upat ka kaso, una illigal discharge of firearms, ikaduha alarm and scandal, violation of the Omnibus Election Code on Gun Ban ug violation on 9262 kani ‘tong panghadlok og babae o bata,” matud ni Tagum.
Nakuha sa posisyon niini ang iyahang Gloc 17 nga pusil ug narekober usab ang pito ka mga basyo sa bala sa area diin kini nagpabuto.
Gipailawon ang maong suspek sa liquor test ug paraphine test.
Gikatakdang atubangon ni Tagum ang maong nag-indiscriminate firing nga pulis kinsa gipaslak na karon sa prisuhan.
“Grabe kasuko nako kay unang-una I felt betrayed kay nagtraydor siya sa iyang uniporme ug sa sworn oath sa serbisyo nga magserbisyo og maayo para sa katawhan pero sa gipakita niining si PO1 Maneja eh di gyod ni pweding mapalampas,” matud ni Tagum.
RadyoMaN Aimee Guinita
