Nagtingkagol karon sa bilangguan ang usa ka pulis human nipusil –patay sa usa ka traysikad driver , sa kalagot nga nagsigi ug pangulitawo sa iyang 83 anyos nga inahan.
Ang suspek nga si PO2 Rowelito Tano, 48 anyos nadestino sa Provincial Mobile Force Company nga nagbase sa Lutopan sa Toledo City .
Samtang ang biktima nga traysikad driver nailhan nga si Fabian Libaton 64 anyos ug molopyo sa Barangay Kanyuko Dumanjug .
Matud sa hepe sa Dumanjug Police Station nga si Police Senior Inspector Gilfred Baroman gisakyan ni Tano si Libaton aron maghusay unta sila sa Barangay Hall tungod sa pagsigi ug pamisita ug pagsamok sa iyang inahan nga byuda ilabi na sa kagabhion.
Samtang dool na sila sa Barangay Hall nagkalalis pa ang duha ug nisangpot sa pagpusil sa pulis ngadto sa biktima ug naigo sa iyang dughan ug paa.
Giingong nalingian ni Tano si Libaton nga niaksiyon ug bunot sa armas hinungdan nga giunhan niya kini sa pagpusil.
Si Tano mag-atubang ug kasong murder.
