Pulis nakatiro sang menor de edad patay

6555

BAGO CITY, NEGROS OCCIDENTAL – Isa ka menor de edad nga patay matapos natiruhan sang isa ka police kagab-i sa Brgy. Taloc, Bago City.

Ang biktima isa ka 17-anyos nga bata nga lalaki, grade 9 student kag pumuluyo sang Irrigation Taloc, ciudad sang Bago.

Ginkilala naman ang suspek nga si Patrolman Richard Rites, 32 anyos, single, residente sang Purok Paraiso 2, Brgy. Taloc, Bago City kag isa ka miembro sang PNP nga assigned sa Tapaz, Capiz.

Suno sa imbestigasyon sang Bago City Police Station nga may mga las 9 kagab-i, ang suspek ang yara sa sulod sang iya tiangge sang ini ang ginpalapitan sang isa ka grupo sang mga kabataan kag nagsiling nga ginalagas sila sang isa pa gid ka grupo.

Bangud sini, ginhambalan sang pulis ang grupo nga ginalakipan sang kapin 5 ka mga bataan nga lalaki nga magsulod sa iya balay apang naglagas gihapon ang isa ka grupo nga armado sang pen gun kag .38 calibre nga rebolber.

Pahayag sang suspek nga una siya gintiro sang apang nag-jam ang ila armas gani wala ini nakalupok.

Ginsiling pa sang suspek nga nagpakilala man siya nga isa siya ka police officer apang sa gihapon nagsulod ang menor de edad nga biktima nga may uyat nga calibre .38 nga armas gani napilitan siya nga magbalos agud depensahan ang iya kaugalingon kag ang iya pamilya.

Nag-angkon sang fatal nga igo sa iya dughan ang biktima nga amo ang gintunaan sang iya kamatayon samtang ang suspek naman yara na karon sa custody sang Bago City Police Office.

Sa karon isa sa ginalantaw nga motibo sang mga katapo sang Bago City Police Station amo ang away sa fraternity sa tunga sang amo nga mga grupo./

Facebook Comments