Pagadian City – Samaran ang usa ka pulis nga warrant server sa nahimong ginukdanay ug pinusilay batok sa duha ka mga suspek sa Barangay San Jose, Pagadian City pasado alas 7:00 karung gabii.
Ang biktimang pulis naila nga si SPO3 Carlos Omentic kinsa naka destino sa Pagadina City Police Station samtang naka sibat ang mga suspek nga sakay sa laing single motor nga color blue.
Sa pagpakighinabi sa RMN Pagadian kang Omentic, gibutyag niini nga samtang gimaneho niya ang motporsiklo nga Honda XRM paingon sa buhatan sa kapulisan sa iyang pagbahada atubangan sa Holy Child Academy kun ( HCA) namatikdan niya nga nataligam-an pagdala ang antipara rason nga gihubo niya ang helmet samtang nagdagan ang motor dungan sa pagkuha sa iyang cellphone arun pakigkutayan ang iyang misis apan niadtong wala damha sa police officer nga nakahigayon na pagpusil ang mga suspek hinungdan sa pagkaigo sa cellphone ug lapos a iyang kamot diin nitapsing ang bala sa iyang aping.
Nakahimo pa sa pag-ambak ang biktima busa nihulbot siya sa pistola ug nibalos pagpusil ngadto sa mga suspek, nahitabo ang ginukdanay samtang nagpinusilay kon asa mikaratil pagdagan ang mga gunman.
Daghanang basiyo sa bala ang nakuha sa crime scene nga karun naa sa kustodiya sa crime laboratory.
Nasuta pa sa RMN Pagadian nga walay CCTV camera sa dapit nahitaboan. Padayon pa nga gisuta sa mga imbestigador ang posible nga hinungdan sa pagpamusil.
