Davao City – Aksidente sumala pa ang nahitabong kamatayon sa usa ka pulis sa Davao del Sur human niini napusilan ang iyang kaugalingon alas-6 sa buntag kagahapong adlawa, Martes, October 15, 2019.
Sa interbyu sa DXDC RMN Davao kang PCPT Robert James Carumba, hepe sa Kiblawan Municipal Police Station (MPS), giila niini ang biktima nga si Police Master Sargeant Brigham Wayne Pascual, 41-anyos, residente sa Davao del Sur ug desk officer sa Kiblawan MPS.
Saysay ni Carumba nga human sa duty niini alas-2 sa kaadlawon, natulog kini sa iyang duyan likod sa istasyon ug gipatong ang iyang M-16 riffle.
Gibutyag ni Carumba nga walay foul play ang insidente subay usab sa gihimong eksaminasyon.
“Walay foul play. Accidental gyud siguro siya kay based on the post-mortem examination sa amoang municipal doctor diri, diri man sa ibabaw, sa forehead niya ang tama,” saysay ni Carumba.
Nagpahimangno usab ang hepe sa uban pang kapulisan nga hinumduman lamang kanunay ang mga patakaran kun guidelines sa pagdala o paggamit og armas.
“Always remember ra gyud sa kanang 4 cardinal rules of gun safety. Mao ra gyung ning peminti balik-balikon namo sa among tropa aron malikayan ang aksidente,” pahimangno ni Carumba.
Sa pagkakaron gipahimutang na ang patay’ng lawas sa biktima.
RadyoMaN Kirby Manzon
