Davao de Oro – Dead On Arrival (DOA) sa tambalanan ang usa ka 26 anyos nga pulis human naunay sa iyang armas sa Purok 12, Brgy.Poblacion, Monkayo, Davao de Oro niadtong June 1, 2020.
Ang namatay mao si Patrolman Ruel June Cervantes Malacao, 26 anyos, ulitawo, residente sa nahisgutang lugar ug nadestino sa Davao de Oro Provincial Mobile Force Company (DDOPMFC) sa Brgy. Pasian lungsod sa Monkayo.
Sumala sa report sa Monkayo Municipal Police Station, nagsaulog sa iyang adlaw’ng natawhan (Birthday) niadtong June 1 si Malacao ug giingong misulod kini sa kwarto sa dihang kalit na lang nadungog ang buto sa armas hinungdan gisubay sa pamilya ug didto nakita na lamang nga naligo sa iyang kaugalingong dugo.
Gihatud pa sa hospital ang biktima apan nakabsan sa iyang kinabuhi.
Na-rekober sa lugar ang service firearms sa pulis nga 9mm Caliber Pistol ug mga bala.
RadyoMaN Jules Catisay
