Davao City – Niatubang na sa piskalya ang pulis alang sa kasong reckless imprudence resulting to homicide human niini aksidenteng napusil-patay ang iyang inahan didto sa Purok 1, Barangay San Roque, New Corella, Davao del Norte.
Gibutyag ni Davao Del Norte Police Provincial Director PSSUPT. Alan Manibog aduna gayuy tulubagon ang pulis nga si PO1 Emmanuel Dumapig sa insidente ug mag-atubang pod kini’g kasong administratibo.
Katimad-an, nga niadtong Abril 7, 2018 alas 9 sa gabie samtang gina dry fire sa suspek ang iyang pusil aksidente niining nakablit ang gatilyo ug nibuto kini sa salamin sa ilang balay igo ngadto sa kwarto diin anaa ang iyang 49 anyos nga inahan nga si Emma Melana Dumapig.
Gisulayan pa og dala sa balay tambalan ang biktima apan gideklara na kining dead on arrival sa mga doktor.
Si PO1 Dumapig, police trainee kini ilawom sa Field Training Program (FTP) ug nadestino sa Regional Mobile Force Battalion (RMFB) sa Police Regional Office XI sa Camp Catitipan, Davao City.
Pahimangno ni Manibog sa tanang kapulisan nga silbing golden rule sa gun safety, inspeksyunon usa ang mga chamber sa gipangkuptang mga baril kung loaded kini ayha pa man mag-praktis aron walay mabutang nga kinabuhi sa peligro.
RadyoMaN Aimee Guinita
