Davao City – Emosyonal ang panagtagbo sa bihag nga police official kinsa gibuhian sa mga New Peoples Army kun NPA human sa kapin pito ka bulan nga wala sila nagkita sa iyang inahan.
Si PI Menardo Cui gibuhian sa mga teroristang NPA ngadto kang Special Assistant to the President Christopher Lawrence “Bong” Go bandang ala 1:45 sa hapon kagahapong adlawa, Hulyo 28 sa boundary sa Magpet, Sitio Apog Apog, Brgy. Panaka, Magpet, North Cotabato.
Sumala ni PRO XI spokesperson PCI Milgrace Driz nga ipailawom ang biktima og psychological debriefing.
“Mag-agi siya’g psychological debriefing kay dili man ingon ana ka sayon kay basin unya kay dunay mga impluwensya gikan sa mga armadong grupo ug wala pa nakuha sa iyaha ang kultura didto,” sumala ni Driz,” matud ni Driz.
Nasubo pa usab kini human nga namatay ang iyang kapikas sa kinabuhi tungod sa kanser samtang gikuptan pa siya mga NPA.
Human nga gawasnon na si Cui dali siyang gidala ni SAP Go sakay sa helicopter.
Nitunol ug sapatos si Go ngadto kang Cui aron masuot niini.
Gitagbo sila nila PCSupt Manuel Gaerlan ang Regional Director PRO Region XI ug PCSupt Marcelo Morales ang Regional Director usab sa PRO Region XII General Santos City didto sa Camp Quintin Mericedo ning syudad.
Kahinumduman nga gidagit si Cui niadtong Disyembre 28, 2017 sa President Roxas North Cotabato kinsa siya maoy deputy chief of police.
RadyoMaN Aimee Guinita
