Pulis nga magdudul-ong han iya anak ha eskwelahan, ginpamumusil

TACLOBAN CITY – Ginpa-uranan hin bala han pusil an sarakyan nga ginmamaneho han usa nga pulis ha atubangan mismo han ira panimalay ha Brgy. Buri, Palo, Leyte kanina han alas 7:10 han aga.

Basi ha report han Police Regional Office 8, ginkilala an pulis nga biktima nga hi PSInsp. Joseph Joevil Domilon Young, 38 anyos, may asawa, presente nga naka-assign ha Regional Headquarters Support Group (RHSG) han Police Regional Office 8 (PRO8) ngan residente ha nasabi nga lugar.

Basi ha inisyal nga imbistigasyon, nakasakay na hiya ha Toyota Vios (color silver) nga iya sarakyan upod an iya anak kay igdudul-ong na unta niya ngadto ha eskwelahan pero gin-aabangan na ngayan hiya han mga suspek nga sakay han Toyota Fortuner (color gray) nga may Plate No. Emi 673 nga nakasurat la ha karton.


Naka face mask, bull cap ngan armado an mga ini kapot an automatic rifle han magpa-uran hin bala ngadto ha sarakyan ni Psinsp. Young. 36 nga basyo han bala an narekober ha crime scene.

Naka-angkon naman hin igo han bala hi Young ha pira nga parte han iya lawas ngan igindara dayon ini ha usa nga hospital ha Tacloban.

Waray naman kaigo hin bala an anak hini nga pareho hira nga duha in sakay na han nasabi nga behikulo.

Ha interview han RMN kan PCInsp. Joemen Collado, Chief Of Police han Palo, nagpapadayon an ira imbisitgasyon kun ano an motibo han mga suspek ha pagpamumusil kan PSInsp. Young.

“As of now, we’re still investigating hini nga insidente. Waray pa kita nakukuha nga anggulo or any motive kun work related ba ini hiya or personal.”

Former Chief han City Drug Enforcement Unit ha Ormoc ini hi PSInsp. Young, tulo kasemana an nakakalabay.

Gintagan naman hin seguridad han PRO8 an pamilya pati na hi Young nga padayon yana nga ginbubulong.

Kumalagiw naman dayon an mga suspek ha direksyon tipakadto ha sta. Fe, Leyte.

Padayon an gindudumara nga hot pursuit operation han mga otoridad.

Facebook Comments