Usa ka suspected big-time drug personality nga pulis ang napatay sa shootout tali sa mga operatiba sa Regional Special Operations Group ug Regional Drug Enforcement Unit sa Talisay City, Cebu karong gabie. Naila ang napatay nga pulis nga si PO3 Ryan Martus Quiamco, kinsa nadestino sa Personnel Holding and Accounting Unit sa Camp Crame. Ang suspek nakaangkon og samad-pinusilan sa iyang lawas nga maoy hinungdan sa iyang hinanaling kamatayon. Suma ni Regional Intelligence Division (RID) chief Senior Supt. Jonathan Cabal, nga misuway sa pagsukol si Quiamco sa mga operatiba sa RID nga nag-serve ug search warrant sa gawas nga bahin sa panimalay sa suspek sa Corona del Mar Subdivision sa barangay Pooc, sa naasoy nga siyudad. Nasayran nga si Quiamco, lakip nga ginganlan ni Presidente Rodrigo Duterte nga nalambigit sa ginadiling drugas. Gawas sa suspek, naangol usab sa shootout ang asawa niini ug laing tulo ka mga sibilyan.
