Pulis nga nakabangga patay og balut vendor gi-relieve na ug mag-atubang og kasong administratibo

Davao City- Gitataw sa Police Regional Office 11 nga dili nila dapigan ang bisan kinsang pulis, opisyal man kini o Police Non-Commissioned Officer (PNCO) kung nakadisgrasya kini og sibilyan.

Matud ni Police Major Catherine Dela Rey, PRO 11 Spokesperson, dili gayod nila i-tolerate ang sayop sa ilahang mga personahe.

Susama sa ubang mga nalambigit sa criminal cases ipahamtang usab ang silot ngadto sa usa ka pulis.

Matud kang Dela Rey, bisan pa man og adunay nahitabong areglo sa pamilya ug sa pulis magpadayon ang hearing sa administrative case niini.

Atol usab sa interbyu sa DXDC, gikumpirma ni Police Col. Richard Verceles, Regional Civil Security Unit 11 Chief, nga personahe niini ang pulis nga si PCMS Napoleon Dexter Parada Castro kinsa nagmaneho sa pick-up nga maoy nakaligis patay sa 74 anyos nga balut vendor nga si Lucio Buenaflor.

Gi-relieve na usab ni Verceles si Castro ug gitugyan ngadto sa Davao City Police Office ang imbestigasyon.

“As part nung preventive measures he was already relieved from his post and he’s presently under the custody of DCPO. Whatever administrative or criminal case then he’ll have to face the consequence of the law,” sumala ni Verceles.

RadyoMaN Aimee Guinita